Kunuku Man ta bishitá VSO-ZMLK Marieta Alberto na Muizenberg.
Dia 14 di november 2022 Kunuku Man
huntu ku Michael i Roel a bishitá skol Mariëta Alberto.
Esaki den kuadro di
konsientisashon pa loke ta trata e problema di shushi aki na Korsou.
E dicho ta bisa ku “Hubentut ta nos futuro”.
Pa e motibo ei a skohe pa un skol sperando ku e mensahe lo jega serka e muchanan i ku nan lo informá nan famianan e importansha di no tira shushi den mondi sino den kliko of un konteiner di shushi.
Michael a hiba palabra ya ku e mayoría di muchanan ta papia papiamentu.
Michael a konta su kuenta na 2 grupo i ela hasié hopi bon. E muchanan a skucha ku hopi atenshon.
Pa medio di e fantástiko borchi Smart di skol por a mustra potretnan kon teribel e situashon di shushi ta na Korsou.
Tabata un mainta sumamemte edukativo pa tur. Pa e alumnonan por a sera konosí ku Kunuku Man i e tremendo trabou ku e ta hasi huntu ku su boluntarionan. Pa nos komo Team di Kunuku Man, ya ku ta promé bia ku nos ta hasi algu asina.
Komo muestra di gratitut pa nos trabou nos a risibi un bunita regalo ku skol mes a traha.
I a palabrá ku e representante di e skol lo bai yuda Kunuku Man limpia un playa riba un djadumingu.
ZMLK Mariëta Alberto danki pa boso atenshon i hospitlidat!